ඉන්ධන මිල ඉහළ දැමීම සම්බන්ධව සමගි ජනබලවේගය විසින් අමාත්‍ය උදය ප්‍රභාත් ගම්මන්පිල ට එරෙහිව ගෙනෙන්නට සූදානම් වන විශ්වාසභංග යෝජනාව ආණ්ඩුවේම කොන්ත්‍රාත්තුවක් බව දේශපාලන ආරංචි මාර්ග සඳහන් කරයි.
සමගි ජනබලවේගයේ නායක, විපක්ෂ නායක සජිත් ප්‍රේමදාස විසින් නැකැත් බලා මෙම විශ්වාසභංග යෝජනාවට අත්සන් තැබීම සමගි ජනබලවේගයට හිතවත් මාධ්‍ය වාර්තා කර තිබිණ.
එනිසාම මේ කරුණු 20කින් සමන්විත ලියවිල්ලේ කිසිදු වැදගත් හෝ තාර්කික කරුණක් නැති බවත් එම ආරංචි මාර්ග පවසයි.
දේශපාලන ආරංචි මාර්ග සඳහන් කරන ආකාරයට ආණ්ඩුවේ අභ්‍යන්තර ගැටුම බැසිල් රාජපක්ෂ හිතවාදි පොදුජන පෙරමුණේ ප්‍රධාන ලේකම් සාගර කාරියවසම්ගේ නිවේදනය නිසා අනවශ්‍ය ලෙස එළියට පැමිණි බවට බරපතළ චෝදනාවක් ආණ්ඩුව අභ්‍යන්තරයේ පවතී. ආණ්ඩුවේ යම් යම් මත ගැටුම් පැවතියත් මෙම නිවේදනය විසින් ආණ්ඩුවේ සාමූහිකත්වයට හානිකර ආණ්ඩුවේ බෙදීමක් ඇතිකරන්නම බලකෙරුනු බව ආණ්ඩුවේ බහුතර අදහස වී ඇත.
එහිදී පොදුජන පෙරමුණේ ප්‍රධාන ලේකම් නිකුත්කළ නිවේදනය ගැන ප්‍රධාන ලෙස බැසිල් රාජපක්ෂටත් ගැලවීමක් නැති අතර ආණ්ඩුවේ බෙදීමක් නැති බව තහවුරු කිරීමට ගම්මන්පිලට එරෙහි විශ්වාසභංග යෝජනාව පාවිච්චි කිරීම උපක්‍රමය වී ඇත.
නමුත් ඉන්ධන මිල ඉහළ දැමීම ජීවන වියදම් ඇමති අනුකමිටුව විසින් ගනු ලැබූවකි. එසේම ඉන්ධන මිල ඉහළ දැමීම සම්බන්ධව නෛතික වගකීම මුදල් අමාත්‍ය ලෙස අගමැති මහින්ද රාජපක්ෂගේ කටයුත්තකි. එසේම ලෝක වෙළෙඳපොළ තුළ ඉන්ධන මිල අඩුවීම තුළ ලබන ලාභය පවා ගනු ලැබුවේ මහා භාණ්ඩාගාරය මිස ඛණිජ තෙල් සංස්ථාව නොවේ.
මේ පසුබිමේ විශ්වාසභංග යෝජනා විවාදය තුළ සමගි ජනබලවේගය පාර්ලිමේන්තු මන්ත්‍රීවරුන්ට සිදුවන්නේ තොත්ත බබාලා මෙන් තේරුමක් නැතුව ගම්මන්පිල වෙත චෝදනා කර හිත හදාගන්න ය.
විශ්වාසභංග යෝජනාව පදනම් විරහිත බැවින් ආණ්ඩුවේ සියළු මැති ඇමතිවරුන්ට ඊට එරෙහිව ජන්දය ප්‍රකාශ කිරීමට හැකියාව ලැබේ.
අවම වශයෙන් සංඛේතාත්මකව සමස්ථ ආණ්ඩුවට එරෙහිව යෝජනාවක් ගෙනාවා නම් එය පරාජය වුවත් ආණ්ඩුව සම්බන්ධව ජනතා විරෝධය අවුලුවීමට එය අවස්ථාවක් කරගන්න තිබිණ. නමුත් දැන් ජනතා විරෝධය ආණ්ඩුව වෙතින් ඉවත්ව විපක්ෂ පදනම් විරහිත චෝදනා කරනවා යන සටන් පාඨය අස්සේ වැසීයාමේ අවධානමක් පවතී.
ඒ අනුව මේ විශ්වාසභංග යෝජනාව ආණ්ඩුවට සෘජු වාසි දෙකක් ලබාදෙයි. පළමුව ආණ්ඩුවේ බෙදීම් අවසන් කර ඉස්සරහට යන්න මේ විශ්වාසභංග යෝජනාව පදනම් කර ගැනීමය. දෙවැන්න වසංගත සමයක විපක්ෂයේ පදනම් විරහිත චෝදනා ගැන ජනතාව විපක්ෂය වෙත චෝදනා කිරීමය. එයින් ජනතාව තුළ මතුව ඇති ආණ්ඩු විරෝධය වෙනතක යැවීමට අවස්ථාව හිමිවේ.
