You are currently viewing ‘நிதி ஒதுக்கீடு’ – 3ஆம் இடத்துக்கு தள்ளப்பட்ட பாதுகாப்பு அமைச்சு!

‘நிதி ஒதுக்கீடு’ – 3ஆம் இடத்துக்கு தள்ளப்பட்ட பாதுகாப்பு அமைச்சு!

2024 ஆம் நிதியாண்டுக்கான அரச செலவீனம் 203 பில்லியன் ரூபாவால் அதிகரித்துள்ளது. அதேபோல அமைச்சுகளுக்கான ஒதுக்கீட்டில் பாதுகாப்பு அமைச்சு மூன்றாம் இடத்துக்கு தள்ளப்பட்டுள்ளது.

2024 ஆம் நிதியாண்டுக்கான ஒதுக்கீட்டு சட்டமூலத்தை நாடாளுமன்றத்தில் முன்வைப்பதற்கு அமைச்சரவை அனுமதி வழங்கியுள்ள நிலையில், அச்சட்டமூலம் இம்மாதம் முன்வைக்கப்படவுள்ளது.

இதில் 2024 அரச செலவீனமாக 3 ஆயிரத்து 860 பில்லியன் ரூபா உத்தேசிக்கப்பட்டுள்ளது. 2023 ஆம் ஆண்டுடன் ஒப்பிடுகையில் இது 203 பில்லியன் ரூபா அதிகரிப்பாகும்.

அமைச்சுகளுக்கான ஒதுக்கீட்டில், பொதுநிர்வாகம், உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சுக்கே அதிக நிதி ஒதுக்கப்பட்டுள்ளது.
அவ்வமைச்சுக்கு அடுத்தாண்டுக்கான 886 பில்லியன் ரூபா வழங்கப்படவுள்ளது.

நிதி, பொருளாதார ஸ்திரப்படுத்தல் மற்றும் தேசிய கொள்கைகள் அமைச்சுக்கு 723 பில்லியன் ரூபா ஒதுக்கப்பட்டுள்ளது. இவ்வமைச்சுக்கு 2023 இல் 614 பில்லியன் ரூபா வழங்கப்பட்டிருந்தது.

பாதுகாப்பு அமைச்சுக்கு 423 பில்லியன் ரூபாவும், சுகாதார அமைச்சுக்கு 410 பில்லியன் ரூபாவும் ஒதுக்கப்பட்டுள்ளது. 2023 இல் பாதுகாப்பு அமைச்சுக்கு 410 பில்லியன் ரூபாவும், சுகாதார அமைச்சுக்கு 322 பில்லியன் ரூபாவும் ஒதுக்கப்பட்டிருந்தது.

போக்குவரத்து மற்றும் நெடுஞ்சாலைகள் அமைச்சுக்கு 403.6 பில்லியன் ரூபாவும், கல்வி அமைச்சுக்கு 237 பிய்யின் ரூபாவும், பொதுமக்கள் பாதுகாப்பு அமைச்சுக்கு 140.7 பில்லியன் ரூபாவும் 2024 ஒதுக்கீட்டு சட்டமூலத்தில் ஒதுக்கப்பட்டுள்ளது.

விவசாய அமைச்சுக்கு 100 பில்லியன் ரூபாவும், நீர்பாசன அமைச்சுக்கு 84 பில்லியன் ரூபாவும் ஒதுக்கப்பட்டுள்ளது.

ஜனாதிபதி அலுவலகத்துக்கு 6.6 பில்லியன் ரூபா ஒதுக்கப்பட்டுள்ளது.

தேர்தல் ஆணைக்குழுவுக்கான ஒதுக்கீடு

ஜனாதிபதி தேர்தல் 2024 ஆம் ஆண்டு நடைபெறவுள்ள நிலையில், அடுத்த நிதியாண்டுக்கான பாதீட்டில் தேர்தல் ஆணைக்குழுவுக்கு 11 பில்லியன் ரூபா ஒதுக்கப்பட்டுள்ளது என தெரியவருகின்றது.

அரசமைப்பின் பிரகாரம் அடுத்த வருடம் ஒக்டோபருக்குள் ஜனாதிபதி தேர்தல் நடத்தப்பட்டாக வேண்டும், நவம்பர் முதலாம் திகதிக்குள் ஜனாதிபதி பதவியேற்க வேண்டும்.

ஜனாதிபதியாக செயற்பட்ட கோட்டாபய ராஜபக்ச பதவி விலகியதையடுத்து, எஞ்சிய காலப்பகுதியாக நாடாளுமன்றம் ஊடாக ரணில் விக்கிரமசிங்க ஜுலை 20 ஆம் திகதி ஜனாதிபதியாக தெரிவுசெய்யப்பட்டார்.

ஜனாதிபதியின் பதவி காலம் 2024 செப்டம்பரில் நிறைவடையவுள்ள நிலையில், அந்த காலப்பகுதியில் தேர்தலுக்கான அழைப்பு விடுக்கப்படும் என்று ஐக்கிய தேசியக் கட்சியின் பொதுச்செயலாளர் அறிவித்துள்ளார்.

பாதீட்டு நிகழ்ச்சி நிரல்

2024 ஆம் நிதியாண்டுக்கான வரவு – செலவுத் திட்டம் எதிர்வரும் நவம்பர் 13 ஆம் திகதி நாடாளுமன்றத்தில் முன்வைக்கப்படவுள்ளது. நிதி அமைச்சர் என்ற வகையில் ஜனாதிபதி ரணில் விக்கிரமசிங்க பாதீட்டை முன்வைத்து உரையாற்றவுள்ளார்.

அதன்பின்னர் நவம்பர் 14 ஆம் திகதி 2ஆவம் வாசிப்புமீதான விவாதம் ஆரம்பமாகும். 2ஆம் வாசிப்புமீதான வாக்கெடுப்பு நவம்பர் 21 ஆம் திகதி இடம்பெறவுள்ளது.

3ஆம் வாசிப்புமீதான விவாதம் நவம்பர் 22 ஆம் திகதி ஆரம்பமாகும். டிசம்பர் 13 ஆம் திகதி பாதீடுமீது இறுதி வாக்கெடுப்பு நடத்தப்படும்.