You are currently viewing වසර 43 කට පසු ත්‍රස්තවාදය වැලැක්වීමේ පනත සංශෝධනය කෙරේ.

වසර 43 කට පසු ත්‍රස්තවාදය වැලැක්වීමේ පනත සංශෝධනය කෙරේ.

ත්‍රස්තවාදය වැලැක්වීමේ පනත (PTA) වසර 43 කට පසුව සංශෝධනය කිරීමට පියවර ගෙන ඇති බව විදේශ අමාත්‍ය මහාචාර්ය ජී.එල්. පීරිස් රාජ්‍ය තාන්ත්‍රික ප්‍රජාව වෙත පවසා තිබෙනවා.

ජාත්‍යන්තර සම්මතයන්ට සහ වඩාත් හොඳම භාවිතයන්ට අනුකූලව සකස් කිරීමේ අරමුණින් මෙම පියවර ගෙන ඇති බවයි අමාත්‍යවරයා සඳහන් කර ඇත්තේ.

විදේශ අමාත්‍ය මහාචාර්ය ජී.එල්. පීරිස් මේ බව පැවසුවේ විදේශ අමාත්‍යංශ ශ්‍රවණාගාරයේ දී  නව වසර සඳහා වන ප්‍රථම රාජ්‍යතාන්ත්‍රික හමුව අතරතුරයි. ඊට මෙරට නේවාසික රාජ්‍යතාන්ත්‍රික ප්‍රජාවද එක්ව තිබෙනවා.

මානව හිමිකම් සහ ප්‍රතිසන්ධානයට අදාළ ප්‍රගතිය පිළිබඳ තොරතුරු පෙබරවාරි මස අවසන් සතියේ ආරම්භ වන මානව හිමිකම් කවුන්සිලයේ 49 වැනි සැසිවාරයට ප්‍රථම හුවමාරු කරගැනීම මෙම හමුවේ අරමුණ වූ බවයි කියන්නේ. යෝජිත සංශෝධන ඇතුළත් පනත් කෙටුම්පත ගැසට් කර ඉන් අනතුරුව අවසන් අනුමැතිය සඳහා පාර්ලිමේන්තුවට ඉදිරිපත් කිරීමට කැබිනට් අනුමැතිය හිමිව ඇතැයි ද ඇමතිවරයා පැවසුවා.

රැඳවුම් නියෝග, සීමා කිරීමේ නියෝග, නියෝග පිළිබඳ අධිකරණ සමාලෝචන කඩිනම් ලෙස පිළිගැනීම, දීර්ඝ කාලීනව රඳවා තබා ගැනීම වැළැක්වීම සඳහා චෝදනා ලැබූවන්ගේ නඩු කඩිනමින් විසඳා අවසන් කිරීම, අදහස් ප්‍රකාශ කිරීමේ නිදහසට බාධා වන වගන්ති අවලංගු කිරීම, මහේස්ත්‍රාත්වරුන් සහ අධිකරණ වෛද්‍ය නිලධාරීන්ගේ ප්‍රවේශය පිළිබඳ විධිවිධාන හඳුන්වා දීම, රැඳවුම් කාලය තුළ හිංසනයන් සහ වධහිංසා පැමිණවීම වැළැක්වීම, පවුලේ අය සමඟ අදහස් හුවමාරු කිරීමේ අයිතිය, දිගුකාලීන රැඳවියන්ට ඇප ලබාදීම සහ එදිනෙදා නඩු විභාග කිරීම යනාදී පරිච්ඡේද සම්බන්ධයෙන් වන සුවිශේෂී සංශෝධන ඊට ඇතුළත් බව අමාත්‍ය ජී.එල්. පීරිස් පවසා තිබෙනවා.

මීට අමතරව දීර්ඝ කාලීන රැඳවියන් සම්බන්ධයෙන් ආරක්ෂක අමාත්‍යවරයාට උපදෙස්දීම සඳහා ත්‍රස්තවාදය වැළැක්වීමේ පනතේ 13 වැනි වගන්තිය යටතේ උපදේශක මණ්ඩලයක් පිහිටුවීම, ත්‍රස්තවාදය වැළැක්වීමේ පනත යටතේ රැඳවුම් නියෝගයක් හෝ සීමා කිරීමේ නියෝගයක් ලබා ඇති ඕනෑම පුද්ගලයෙකුට එම නියෝගය සමාලෝචනය කිරීම සඳහා ඉල්ලීමක් යොමු කිරීමට අවස්ථාවක් ලබා දීම ආදිය ඊට ඇතුළත් බවයි ඔහු පවසා ඇත්තේ.